Almennt er ekki ráðlagt að gelda hvolpa/hunda fyrr en í fyrsta lagi 14 -18 mánaða. Ástæðan fyrir þessu er bæði vegna félagsþroska og líkamsþroska. Hundar þurfa að fá tækifæri til að klára meginþorra félagsþroskans ásamt því að kynhormónin eru mikilvæg fyrir vöxt og þroska liða og beina. Hormónatengt atferli festist ekki í sessi fyrr en í fyrsta lagi eftir 2 ára aldurinn, því er nógur tími til að grípa inn í á milli 14 og 24 mánaða aldurs. Sama á við um hvolpa sem eru eineistungar. Sumar tegundir hunda eru í áhættuhóp þegar kemur að t.d. að slíta krossbönd og þá er gelding ekki góður kostur þar sem mikilvægt er að vöðvar og liðir nái að þroskast samfara stækkun beina.
Kynhormónar geta verið mikilvægir hundum sem þjást af kvíða þar sem þeir veita ákveðið hugrekki og auðvelda því hundum að yfirstíga hluti sem þeir geta skynjað sem „hættulega“ og fá því þannig tækifæri til að læra.
Geldingastafur getur verið góður kostur fyrir eldri og veikari hunda, en einnig til að ath hvort gelding hafi yfirhöfuð tilætluð áhrif. Einnig er það ágætur kostur í að lyfjagelda hund til að koma í veg fyrir óæskilega pörun. Stafurinn tekur 6 vikur að virka að fullu en virkar annars vegar í 4-6 mánuði (lítill stafur) eða 12-18 mánuði (stór stafur). Geldingastafur er ekki krabbameinsvaldandi og hefur ekki áhrif á frjósemi eftir að hann hættir að virka.
Sumir sérfræðingar halda því fram að merkingar minnki um allt að 70%, sumir hundar hætta að merkja inni. Ef hundurinn er ekki húshreinn fyrir hefur gelding lítil áhrif á pissustand inni við. Hundar hætta aldrei alveg að merkja enda er þetta náttúruleg leið fyrir þá að koma skilaboðum til annarra hunda.
